मुंबई : राज्यातील शेतकऱ्यांना आता रोजचा बाजारभाव, बाजार समित्यांमधील मालाची आवक, विविध योजना यांची माहिती आता मोबाइलवर अॅपद्वारे उपलब्ध होणार आहे. कृषी पणन मंडळाने ‘एमएसएएमबी’ नावाने मोबाइल अॅप विकसित केले असून, ते गुगल प्ले स्टोअरवर मराठी आणि इंग्रजी भाषेत मोफत उपलब्ध आहे.
‘सध्या अनेक व्यवहार मोबाइलवर करण्यात येतात. कोणतीही माहिती एका क्लिकवर उपलब्ध होऊ शकते. कृषी पणन मंडळाच्या माध्यमातून राबवित असलेले विविध प्रकल्प, योजना, उपक्रम, बाजारभाव, बाजार समित्यांची एकत्रित माहिती शेतकऱ्यांना सहज उपलब्ध व्हावी, यासाठी हे मोबाइल अॅप विकसित करण्यात आले आहे. महाराष्ट्रातील व इतर राज्यांमधील बाजार समित्यांमध्ये होणारी शेतमालाची रोजची आवक, बाजारभाव, शेतकरी उत्पादक कंपन्यांची माहिती, शेतकरी आठवडी बाजार, कृषी पणन मित्र मासिक, फलोत्पादन निर्यात प्रशिक्षण इत्यादीबाबतची सर्व माहिती शेतकऱ्यांना या अॅपद्वारे उपलब्ध करून दिली जात आहे,’ अशी माहिती पणन मंत्री प्रा. राम शिंदे यांनी मंगळवारी (२७ ऑगस्ट) मुंबईत दिली.
‘सर्व बाजार समित्यांना त्यांच्या आवारात आवक होणाऱ्या शेतमालाची दैनिक आवक व बाजारभाव याबाबतची माहिती या अॅपद्वारे भरता येते. त्यामुळे बाजार समित्यांमधील बाजारभावांची माहिती एकत्रितरीत्या उपलब्ध होते. शेतमालाची थेट विक्री अथवा खरेदी करण्यासाठी विक्रेता व त्याचा शेतमाल आणि खरेदीदार याबाबत माहिती प्रसिद्ध करण्याची सुविधा या अॅपद्वारे उपलब्ध करुन देण्यात आली आहे,’ असेही शिंदे यांनी स्पष्ट केले.